Anxélica
Florencio Vaamonde Autora da ficha: María Vilariño Suárez |
Edicións | Estrutura editorial | Recensión | Datos narratolóxicos | Observacións |
A novela comeza cunha referencia á morte de Xuan de Vilardefrancos, criado de don Fernando de Silvoso. A relación entre Xuan e don Fernando excede á habitual relación criado-amo posto que foron educados xuntos e manteñen unha grande amizade. Os seus camiños diverxen na mocidade pois don Fernando marcha estudar a Santiago de Compostela, mentres que Xuan ingresa como soldado no exército capitaneado polo marqués de la Romana. Participa así en campañas militares en Francia, Rusia, Alemaña, etc. até que, anos despois, volve atoparse con don Fernando en París, onde este reside con Anxélica, a súa filla. O reencontro é aproveitado por don Fernando para lle ofrecer a Xuan o posto de mordomo na casa grande de Silvoso, en Ouces, xa que ten pensando afastarse da vida política e regresar á súa terra, feito que cómpre á súa delicada saúde. Anxélica, educada en París, distráese en Ouces lendo, paseando, etc. Afeita como estaba á axitada vida social parisiense tarda un tempo en afacerse á tranquila vida da aldea. Falecido Xuan de
Vilardefrancos, preséntase na casa Estebo de
Salorio para solicitar o posto de mordomo. Dada a enfermidade de Don
Fernando todos os asuntos da casa pasan polas mans de
Anxélica.
Estebo namórase dela desde o primeiro intre.
Anxélica amosa un crecente interese por el, aínda
que o criado pensa que a
súa
condición social lle impide ser correspondido. Ela pensa que
el
é tímido, feito que a leva a trazar un plan para
conseguir que se lle declare. A lectura do Orlando furioso
inspíraa para acudir a unha das festas da aldea disfrazada
de
xeito que ninguén sexa quen de recoñecela. Estebo
fíxase na moza descoñecida e despois de
conversaren e
bailaren, ofrécese para acompañala a casa. Ela
trata de
escusarse mais non consegue librarse del. Polo camiño ela
intenta facerlle ver que “a súa ama”
está
namorada del, mais el non o acepta. Cando chegan á porta da
casa, ela pídelle que lle ensine a horta.
Manteñen
relacións sexuais e Anxélica queda embarazada. As
diferenzas sociais fana dubidar, mais Estebo, aconsellado por un seu
tío, fórzaa a tomar unha decisión,
contándolle que deixará en breve de ser o seu
criado
posto que seu pai ten amañado un casamento moi beneficioso
socialmente para el. O principal impedimento que Anxélica ve
é o seu propio pai, mais finalmente este morre a
consecuencia da
enfermidade que viña padecendo e, pouco tempo despois,
Anxélica e Estebo casan. Un día despois do
casamento nace
a súa primeira filla. Anxélica dedica todo o seu
tempo a
refinar o seu home, ensínalle francés e todo o
preciso
para xestionar as súas terras. Un ano despois do nacemento
da
súa segunda filla, Anxélica morre deixando
só a
Estebo que, polo seu medre social, pasa a ser a envexa de moitos dos
criados da aldea. |
|||
Catálogo elaborado dentro do Proxecto de Investigación Narrativa, discurso da historia e construción da identidade na Galiza (PGIDIT07PXIBI04151PR) subsidiado pola Consellaría de Innovación e Industria da Xunta de Galicia. Contacto: novelahistgal@yahoo.es © Francisco Salinas et alii, 2011 Deseño e realización técnica: Laura Mariño |