A pecadenta silenzosa
Manuel Bergueiro López Autora da ficha: María Vilariño Suárez |
Edicións | Estrutura editorial | Recensión | Datos narratolóxicos | Observacións |
As
parroquias de Conles e Abeiro centran o desenvolvemento narrativo. A
novela ábrese coa descrición da parroquia de
Conles;
alí vive o Sr. Lourenzo da Boullosa, o taberneiro,
máis
coñecido como Petapouco. Na veciña parroquia de
Abeiro
hai un pazo, onde vive D. Xavier Feixóo de Castro. A finais
do
século XIX Prácido Feixóo, fillo deste
e
médico, realiza diversas viaxes por Europa. Nunha delas,
polos
Países Baixos, coñece ao tamén
médico
Roberto Koch. El e Feixóo traban amizade rapidamente e
comezan a
traballar xuntos. Cando Koch descobre o bacilo ao que lle
dará
nome, Prácido Feixóo escribe un libro sobre o
mesmo. Os
anos van pasando e Feixóo e Koch traballan xuntos en
Berlín até que Prácido recibe unha
carta da
súa nai informándoo acerca da grave enfermidade
do seu
pai e pedíndolle que regrese. Cando chega a Abeiro
atópase co enterro de seu pai. Prácido fica un
tempo
facéndose cargo dos asuntos familiares e viaxando
ocasionalmente
a Berlín. Finalmente abandona a investigación
médica e instálase no pazo familiar. Ten xa
corenta anos
e, desexando formar unha familia, casa subitamente con Xenerosa, unha
das criadas do pazo. Prácido e Xenerosa teñen
dúas
fillas, a primeira delas é María de la
Consolación
Feixóo Pereiro, coñecida por todos como
Maruxiña
da Consolación. A nena nace en 1884 e, no mesmo ano, o Sr.
Lourenzo da Boullosa ten tamén un fillo, Manoel Alfonso. Os nenos crecen xuntos e van xuntos á escola. Maruxiña convértese nunha fermosa moza e Manoel Alfonso comeza a destacar nos estudos; tanto que a nai pensa en facelo crego. El é un mozo virtuoso, calquera cousa que se propón lévaa a cabo con éxito. Os seus coñecidos e veciños están admirados polo cortés e respectuoso do seu comportamento con Maruxiña. En 1897 o Sr. Lourenzo leva o seu fillo a Santiago de Compostela para que comece a carreira eclesiástica mais aos vinte anos decide facerse avogado, aínda que non abandona os estudos de teoloxía. Na noite de san Xoán, Manoel e Maruxiña van á festa na parroquia do Requeixo en Conles. El emociónase polos sentimentos que ela lle esperta. Aos poucos días vense na misa e cítanse para esa mesma tarde no prado dos Batán, alí decláranse mutuamente o seu amor. Tres anos despois a relación prosegue, mais Manoel Alfonso marcha cunha bolsa a Francia. Comeza así o seu periplo, posto que despois viaxa a Madrid co obxectivo de ingresar no corpo diplomático, conségueo e é destinado á Habana. Maruxiña vai ficando cada vez máis triste, escúsase dicindo que non recibiu del máis que unha carta en tres meses, mais a realidade é que quedou embarazada na noite da súa despedida. Maruxiña non resiste a situación e parte a Cuba na procura do seu namorado. Chega á Habana e comeza a traballar nunha tenda como costureira. Non consegue atopar a Manoel Alfonso e pensa que todo o que el lle dixo foron enganos e mentiras. Pouco a pouco o seu ánimo vai esmorecendo aínda máis. Un día, pola rúa, crúzase cun descoñecido que confunde co seu amor perdido, feito que a deixa desolada. Mentres ela está na Habana a procuralo polos recunchos, el está de volta en Conles. Vai buscala e só atopa a nai dela que lle explica o que Maruxiña fixo dado o seu estado. Manoel desespérase e conta que, chegado á Habana, viu que a carreira diplomática requiría enormes gastos e que o soldo que gañaba non era suficiente para sobrevivir, así que solicitou un traslado a Bos Aires, tendo en mente o regreso a Galiza para reencontrarse con Maruxiña. O
diplomático acaba marchando
novamente a Madrid para preparar as oposicións a procurador,
alí casa cunha moza madrileña. Pouco tempo
despois nace a
súa filla e trasládanse a Barcelona por mor do
traballo
del. Mentres tanto Maruxiña regresa a Conles deixando a
Nazario,
o seu fillo de oito anos, na Habana cos tendeiros para os que
traballaba. Anos despois Nazario marcha a Barcelona e acaba casando coa
filla do procurador de Conles sen que ninguén saiba do seu
parentesco. |
|||
Catálogo elaborado dentro do Proxecto de Investigación Narrativa, discurso da historia e construción da identidade na Galiza (PGIDIT07PXIBI04151PR) subsidiado pola Consellaría de Innovación e Industria da Xunta de Galicia. Contacto: novelahistgal@yahoo.es © Francisco Salinas et alii, 2011 Deseño e realización técnica: Laura Mariño |