Ilustrísima
Carlos Casares Autora da ficha: Alva Martínez Teixeiro |
Edicións | Estrutura editorial | Recensión | Datos narratolóxicos | Observacións |
A novela alicérzase na construción dun personaxe inventado que funciona como intérprete dos acontecementos. Este protagonista, Ilustrísima, correspóndese cun heroe sen grandes paixóns, mais cunhas inquedanzas espirituais e intelectuais diverxentes dentro da curia galega de principios do século XX. A perspectiva do personaxe respecto aos acontecementos do seu tempo permítenos coñecer as pequenas conspiracións, as intrigas e as loitas de poder que se daban nos bastidores dunha institución tan poderosa como a Igrexa. Neste sentido, a novela céntrase na crise relixiosa e de valores que atravesou a Igrexa na referida época, revelando un atraso parcialmente dominado pola superstición e pola intolerancia. Esta crise funcionará como liña divisoria entre dous polos opostos e de valor universal: o polo do escurantismo, representado polo cerco abafante de homes da Igrexa que rodean o pazo episcopal, e o polo do ideal ilustrado, personificado na figura do bispo. Dous fitos históricos de natureza local estruturarán esta lectura dialéctica da obra: a polémica instalación do cinematógrafo na cidade e a revelación dos supostos poderes sobrenaturais dunha relixiosa da diócese. Estes dous aspectos ocuparán de modo subrepticio a política diocesana de Ilustrísima, contrario ao fanatismo derivado, tanto da oposición á instalación do primeiro cinematógrafo, como dos milagres da relixiosa. Así, o
autor articula os elementos históricos
dentro
dunha historia estruturada como unha particular loita protagonizada
polo bispo contra as tebras, que o leva a publicar, baixo
pseudónimo, nun xornal liberal, un conxunto de artigos de
rabia
bíblica contra unha Igrexa sectaria, intolerante e violenta
que
despois, pola paz da diócese terá que condenar. |
|||
Catálogo elaborado dentro do Proxecto de Investigación Narrativa, discurso da historia e construción da identidade na Galiza (PGIDIT07PXIBI04151PR) subsidiado pola Consellaría de Innovación e Industria da Xunta de Galicia. ![]() ![]() Deseño e realización técnica: Laura Mariño |