Non agardei por ninguén
Ramón de Valenzuela Autora da ficha: Alva Martínez Teixeiro |
Edicións | Estrutura editorial | Recensión | Datos narratolóxicos | Observacións |
Trátase dunha novela de personaxe, centrada na vida dun fuxido da Guerra Civil, Don Gonzalo de Ozores, na que, o feito de que o protagonista non viva sempre clandestinamente permite unha maior presenza do elemento social do que noutras novelas de temática semellante. A narración é ocupada por figuras representativas de dous grupos ben delimitados (os falanxistas e os defensores da República) e un terceiro conxunto social definido pola ausencia de compromiso perante os acontecementos que viviu Galiza, e tamén España no primeiro terzo do século XX. Nesta obra hai dúas estratexias que nos permiten ampliar a información estritamente local propia dunha vida na clandestinidade. En primeiro lugar, as referencias aos medios de comunicación: son frecuentes as referencias a informacións sobre o desenvolvemento da guerra emitidas polas radios da resistencia. En segundo lugar, a experiencia directa do protagonista ao abandonar a vida furtiva e ao desprazarse a outro punto da península no momento en que se ofrece no recrutamento para ir infiltrado á fronte en Cáceres. A obra presenta
algúns aspectos de certos episodios da
Guerra
Civil, non tratados antes nas nosas letras, ofrecéndose como
un
texto informativo e político caracterizado por trazar un
retrato
panorámico da guerra. Como texto informativo e político, é salientábel a vontade documental do mesmo, así como a presenza explícita dos principios defendidos polo narrador e, principalmente, polos personaxes nas conversas sobre as ideas e valores do momento. Así encontramos, por exemplo, o diálogo mantido polo protagonista cos outros guerrilleiros que facían parte do seu grupo durante a súa vida clandestina –onde son expostas as súas diferentes opinións sobre a situación– ou os encontros posteriores, xa no bando falanxista, con outros republicanos clandestinos. Por
último, salientaremos a existencia dun segundo eixo
argumental relacionado co primeiro, de carácter sentimental,
mais igualmente afectado polos acontecementos históricos: o
namoro do protagonista cunha falanxista ensombrecido pola dificil
conxuntura política que rodeaba a relación. |
|||
Catálogo elaborado dentro do Proxecto de Investigación Narrativa, discurso da historia e construción da identidade na Galiza (PGIDIT07PXIBI04151PR) subsidiado pola Consellaría de Innovación e Industria da Xunta de Galicia. Contacto: novelahistgal@yahoo.es © Francisco Salinas et alii, 2011 Deseño e realización técnica: Laura Mariño |