Fra Vernero
Ramón Otero Pedrayo Autora da ficha: Amelia Sánchez Pérez |
Edicións | Estrutura editorial | Recensión | Datos narratolóxicos | Observacións |
Tempo da historia: Fra Vernero localízase temporalmente nos séculos XVIII e XIX. Coñecemos a Zacarías Werner por ser unha personaxe real que viviu entre os anos 1768 e 1823. No entanto, na novela coñecemos a un Werner xa adulto, polo que o comezo do tempo da historia se aproximaría ao final do século XVIII. Canto ao remate, non hai dúbida de que o relato finaliza no outono de 1823, o momento en que dous dos monxes de Mariazell comentan a morte de Werner en Viena. Desta maneira, consideramos que o tempo da historia abranguería arredor de tres décadas entre os finais do século XVIII e o ano 1823. Personaxes: Sen dúbida a novela Fra Vernero vai ter como personaxe principal e case única a Zacarías Werner (podendo mesmo chegar a pensar en adscribir a novela ao xénero da novela de formación ou bildungsroman). A través das dúas lembranzas asistimos á súa mocidade en Koënigsberg. Coñecemos o seu traballo como funcionario e como escritor en Varsovia e en Berlín e, no remate do relato, presenciamos a súa conversión ao catolicismo e a súa ordenación monacal. Por tanto, a novela céntrase na vida, desde a súa formación até a súa morte, desta personaxe protagonista. Outras personaxes menores, que son nomeadas mais case non ocupan lugar na narración, serí an a nai de Werner, Hoffmann, Goethe, Madame Staël, Fra Gaetano ou o príncipe Dalber. Acontecementos históricos: A pesar da forte pegada da novela de formación neste relato, podemos describir Fra Vernero como unha novela histórica, pois os acontecementos históricos aparecen presentes en todo o desenvolvemento da trama argumental. Os feitos históricos son o pano de fondo constante, aínda que non son descritos en detalle e en moitas ocasións simplemente se nomean. Algúns acontecementos dos que se fai mención son os que relatamos a seguir: a constitución de Locke para Carolina do Sur, o tratado de Westfalia, o imperio de Federico II, a batalla de Fonteney entre as tropas inglesas de Cumberland e as do Delfín de Francia, a morte na guillotina de Chenier, a chegada do exército revolucionario a Italia, o apresamento do Papa polas tropas de Napoleón ou a batalla de Waterloo. Por outro lado, resulta sumamente interesante o catálogo de personaxes históricas que desfilan polas páxinas de Fra Vernero: Hoffmann, Goethe, Madame Staël, Herder, Voltaire, Kant, Swendborg, Newton, Lutero, Hugo Fóscolo, Mozart, Rousseau, Chauteaubriand, André Chenier, Novalis, Robespierre... Tema: Consideramos Fra Vernero unha novela esencialmente histórica posto que a súa finalidade principal é a de describir a sociedade europea de comezos do século XIX, nomeadamente no que afecta á súa vida cultural e artística. No entanto, non podemos esquecer o peso que o bildungsroman ou novela de formación tería nesta narración. Narrador: O narrador principal en Fra Vernero é un narrador obxectivo en terceira persoa, que narra os feitos e que non intervén no discurso narrativo, limitándose a describir os acontecementos tal e como sucederon. Espazo narrativo: Esta novela vai destacar polos numerosos espazos en que se desenvolve a trama. Os primeiros capítulos van ter lugar nas rúas da cidade de Varsovia que, xunto con Berlín e con Viena, ser á o espazo principal. Porén, existen outros espazos que debemos mencionar: Koënigsberg (a cidade natal do autor), Tubinga, Frankfurt, diferentes cidades de Suíza e de Italia ou Salzburgo. Digno de mención será tamén o mosteiro de Mariazell, en que Werner pasa parte dos seus derradeiros anos. Estrutura narrativa: Trátase dunha narración lineal, mais en cuxo discurso narrativo son moi frecuentes as analepses, en que o autor lembra a súa infancia. Así, no capítulo II, Werner lembra a súa nenez en Koënigsberg, o traballo de seu pai como profesor de universidade e o momento en que este morreu. Igualmente, resulta significativo o capítulo V, en que o relato se desloca temporal e espacialmente a través de diferentes cidades europeas (Padua, Salzburgo, Windsor, París…) para nos relatar diferentes feitos históricos. |
|||
Catálogo elaborado dentro do Proxecto de Investigación Narrativa, discurso da historia e construción da identidade na Galiza (PGIDIT07PXIBI04151PR) subsidiado pola Consellaría de Innovación e Industria da Xunta de Galicia. ![]() ![]() Deseño e realización técnica: Laura Mariño |