O castelo de
Pambre
Antonio López Ferreiro Autora da ficha: María Vilariño Suárez |
Edicións | Estrutura editorial | Recensión | Datos narratolóxicos | Observacións |
Gonzalo Ozores de Ulloa regresa grazas ao seu criado Fernán Vázquez de Francia coa intención de recuperar as terras pertencentes á súa familia. Aproveitando o seu retorno restabelece a amizade con Beringuela e seus pais, especialmente con Vasco Fernández que lle axudará no seu proxecto. Os criados Alberte e Domingos tamén participan na recuperación das terras aínda que finalmente Alberte estabelecerá contrato de vasalaxe con Vasco Gómez das Seixas, usurpador das terras dos Ulloa e principal obxectivo a bater para Gonzalo e os seus aliados. Beringuela, caracterizada como unha muller valente e independente, acode á voda de Leonor, criada, amiga e irmá de leite súa. Durante esta estancia fóra da súa casa esta é atacada polas tropas de Vasco Gómez das Seixas capitaneadas polo seu fillo Nuño e seus pais capturados. Cando Beringuela descobre o acontecido decide unirse aos cativos provocando o arrepentimento en Nuño, dado o amor que este sinte por Beringuela, e facendo que este trate de urdir un plan de liberación. A noticia do
cativerio de Beringuela e seus pais chega a ouvidos de
Gonzalo Ozores que comeza a tramar a súa
liberación. A recuperación de terras prosegue coa
toma do castelo de Curbián que deixa novamente en mans do
seu pai para comezar a preparar o asalto á fortaleza de
Sampaio onde están cativos Beringuela e seus pais. A batalla
que remata coa toma de Curbián personalízase na
loita entre Alberte e (Do)Mingos situados en cada un dos bandos
enfrontados e remata coa morte de Nuño. Beringuela e a súa familia instálanse nunha súa casa na parroquia de Rodieiro, Gonzalo mentres tanto parte para visitar aos seus vasalos. De súpeto faise a descrición dunha fermosa moza que chega ás recuperadas terras dos Ulloa acompañada dunha pequena comitiva. A moza resulta ser María, filla de don Álvaro Páez de Soutomaior que a acompaña na viaxe co obxecto de casala con Gonzalo Ozores. Gonzalo, desconcertado ante a proposta, solicita tres días para dar unha resposta, nese lapso temporal Fernán Vázquez acode a casa de Beringuela explicarlle a mudanza na situación, esta renuncia ao seu amor por Gonzalo e remata a historia co casamento de María e Gonzalo. No apartado final,
“Engademento á
lenda”, aparece Gonzalo Ozores acompañado por un
neno de visita nun convento. Finalmente descóbrese que
está visitando a Beringuela e insinúase que o
neno é fillo de ambos posto que se alude ao seu nome:
Gonzaliño e á promesa que Gonzalo Ozores lle ten
feito a Beringuela de crialo como un Ulloa. |
|||
Catálogo elaborado dentro do Proxecto de Investigación Narrativa, discurso da historia e construción da identidade na Galiza (PGIDIT07PXIBI04151PR) subsidiado pola Consellaría de Innovación e Industria da Xunta de Galicia. ![]() ![]() Deseño e realización técnica: Laura Mariño |