O niño de pombas
Antonio López Ferreiro Autora da ficha: María Vilariño Suárez |
Edicións | Estrutura editorial | Recensión | Datos narratolóxicos | Observacións |
Mariña e Ramil viven namorados mais non son quen de confesarse os seus sentimentos. A acción iníciase coa visita de Ramil a Mariña co fin de comunicarlle as novidades no estado do seu irmán Sancho que foi apreixado por Godesindo, señor de Donrramiro, irmán de Mariña e partidario do rei de Portugal Afonso Enríques. O monarca portugués está a batallar na zona fronteiriza entre Ourense e Portugal. Mariña desgústase enormemente ante as noticias transmitidas; máis aínda tendo en conta que a súa outra irmá, Alvira, tamén está presa nas mans de Godesindo e que ela é orfa de pai e nai, sendo Ramil a única familia que lle queda neses momentos. Ramil
comprométese a defender as terras e pazo de
Mariña e mentres isto sucede será o seu propio
pazo o queimado. Pouco despois Ramil é apreixado e por medio
dun compañeiro de cela, Fernando, remítelle a
Mariña unha parella de pombas dentro dun niño que
contén unha nota coa que Ramil lle desvela os seus
sentimentos. Este acontecemento provoca a desesperación de
Mariña que dubida de que a súa
relación poida ser ben vista aos ollos de Deus dado o
parentesco que os une. Atemorizada acode a visitar ao Abade de
Carboeiro. Ao tempo comunícanlle que Don Xuan
Fernández de Lima derrotou o rei de Portugal e que a
liberación de Sancho e Ramil é, por tanto,
inminente. O Padre Froilán confésalle a
verdadeira historia do nacemento de Ramil, afirmándolle que
é fillo dunha peregrina lombarda chamada Ermemberga e
convida a Mariña a iren xuntos de visita ao mosteiro de San
Pedro de Ansemil onde vive un frade (o Padre Munio) que antes foi paxe
de Adosinda (nai adoptiva de Ramil) e que coñece
á perfección a historia das orixes de Ramil. Unha
vez confirmado que non existe parentesco sanguíneo entre
Ramil e Mariña esta fica satisfeita. A súa
felicidade completarase coa posta en liberdade dos seus
irmáns, Sancho e Alvira. Pouco tempo despois de que Ramil
acuda á súa casa após a súa
liberación e ambos se confesen os seus sentimentos casan no
mosteiro de Carboeiro. Ao terceiro día dos oito que dura o
convite aparece Ermemberga no seu peregrinar anual co fin de expiar o
pecado do nacemento dun fillo ilexítimo. Esta
preséntase diante da parella de recén casados
como nai de Ramil e dálles a súa
bendición; a boa acollida que lle proporcionan
Mariña e Ramil e as referencias á fuxida e
desaparición dos partidarios do rei de Portugal completan a
historia. |
|||
Catálogo elaborado dentro do Proxecto de Investigación Narrativa, discurso da historia e construción da identidade na Galiza (PGIDIT07PXIBI04151PR) subsidiado pola Consellaría de Innovación e Industria da Xunta de Galicia. Contacto: novelahistgal@yahoo.es © Francisco Salinas et alii, 2011 Deseño e realización técnica: Laura Mariño |